بسم الله الرحمن الرحيم
بسم الله الذي علم بالقلم، علم الإنسن ما لم يعلم، والصلاة والسلام خير معلم الناس الخير محمد ﷺ
السلام عليكم ورحمه الله وبركاته...أسعد الله أوقاتكم يا أطباء المستقبل، بلا طولة سيرة وكثرة حكي نخش ع السّريع:
صلّوا ع النبي خلينا نبدأ..؟
قائمة المواد
النسائية
نبلّش في اول روتيشن وهي روتيشن الأهلي:
المواضيع بتتقسم ما بين الدكتور عبد الناصر والدكتور عبد الفتاح، مواضيعها كثير مهمة، وبسألوا عنها في الروتيشنات الثانية خصوصاً ال CTG و ال HTN، استغلوا الروتيشن وخلوا الدكتور يشرحلكم أكبر عدد من مواضيع الروتيشنات الثانية، الدكاترة شاطرين كثير، والمقيمين مناح تحديدًا ممدوح دريدي، هذا اسألوه عن اي اشي ما شاء الله عنه، مش مخلي، وبفهّم.
- فش برزنتيشنات، بس الدكتور ببلش معكم في الموضوع وشو بتعرفوا عنه واحد واحد، وبتكتبوا وراه ملاحظات.
- ضروري تحضّروا قبل بيوم وتراجعوا المحاضرات السابقة.
- الدكتور عبدالناصر بسأل، وهو شديد شوي، بس بفهّم.
- كتاب كابلان وفيديوهاته كافين للروتيشن مع التلخيصات اللي رح تلاقوها بمجلد الجاينا دفعة 2019 ورح اضيف الروابط اختصارا لوقتكم الثمين، وضرووووووري جداً تسوفوا محاضرة الأناتومي ع المكتبة، بلزمش تشوفوا مصادر ثانية.
- اطلبوا امتحان، عشان ما تشعروا انكم مظلومين بالتقييم، وعشان يكون معكم اسئلة للفاينل
. - اذا طلبوا منكم هيستوري، ففي إلهم فورم خاص بالأهلي، وقبل ما تعرضوها ع الدكتور خلوا المقيمين يراجعوها.
- ضرووووووووري تحضروا المورننج بلاش تنقل قيمتكم
______
روتيشن المِحتسب
- عندكم الدكتور صفوت، ما شاء الله عليه، رقي في التعامل وأدب، واسلوبه في المحاضرات بختلف عن غيره، لانه انت بتمسك الموضوع وبتبلش تشرح فيه، وهو بضيف كم نقطة زغيرة، ديروا بالكم عليهن واكتبوهن، رح تطلعوا من هاي الروتيشن حافظين وفاهمين أحسن من أي روتيشن ثاني في رابعة.
- الدكتورة أماني، شاطرة كثير، سريعة في الحكي شوي ، وبتحكي كثير "شغلات بتلزم للإمتحان وشغلات وبتلزمش، بس مهمة كطبيب، بس حاولوا اكتبوا ملاحظاتها، بجي منها في الفاينل,
- اذا حابين تنبسط منكم خلوا البرزنتيشنات باللون البنفسجي ، وحضّروا من كتاب تن تيتشر لبرزنتيشناتكم.
- كتاب كابلان كافي مع صفوت، بس اماني لأ، يعني مواضيع اماني ادرسوها من المحاضرات ع المكتبة، او من تنتيتشر، وضروري تحطوا في البرزنتيشن تبعكم مصادر زي موقع غرين توب ، او رويال كوليج.
- ملحوظة: الدوام في المحتسب حِلو كثير، مش زيما بحكوا، ورح تنبسطوا، خصوصاً مع صفوت.
- واطلبوا امتحان MCQ لانه اسئلتهم في الفاينل مش سهلة.
- فش هيستوري في المحتسب، واحضروا عيادة مع صفوت، بتنبسطوا فيها.
_______
روتيشن عالية:
- الروتيشن هاي جامدة، ودسمة خصوصاً إذا كنتوا ماخذين روتيشنات قبلها،
- ضروري تكونوا دارسين هيستوري وفيزيكال منيح، هاد الملف ممتاز، ومهم تتمكنوا من المواضيع في الروتيشنات اللي قبل، ولما تاخذوا الهيستوري تمشوا على الفورم اللي على المكتبة، من هنا، وتحطوا دفرنشلللاعراض وتبلشوا تنفوا فيها، الدكتورة هيلدا بتبهدل على الدفرنشل
- حضروا برزنتيشنكم منيح واستفيضوا في الشرح واتمكنوا منه، بنفعش تعملوا برزنتيشن ع القد، بدكم تعملوه بمستوى أخصائية، لانهم في عالية بسالوا كثير، وبدقوا ع التفاصيل كثير،
- للأسف كابلات مش كافي للروتيشن، ضيفوا عليه الحكي من تلخيصات دفعة 2019، أدرسوه قبل بيوم، ٩٠٪ من حكيهم ما رح يطلع عن هاي الملفات، وكل حرف بحكوه مهم خصوصاً عيادة د.هيلدا، في شغلات حكتها اجت في الفاينل واللي ما كتبها عكمها.
- رفعتلكم ملف لعالية اجت منه جميع امتحانات الأوسكي، ادرسوه منيح، واياكم ثم اياكم تفتحوه في الروتيشن او قدامهم، بلاش يجيبوا ملف جديد
- وأسئلة الروتيشنات السابقة بكرروا منها كثير في الروتيشن، واجت نصاً حرفاً في الفاينل، فااا اعملولكم مجلد وبعد كل روتيشن ارفعوا الامتحانات عليه.
______
اخيراً روتيشن الهلال
- أحلا روتيشن فيهم،
- في المستفشى كثير راقيين بالتعامل معكم وبين بعضهم، بحبوا يشرحوا، وشاطرين كثير، الدكتور وجيييه نهفة رسمي ، والشباب رح ينبسطوا معه كثير، مواضيع الدكتور نضال مهمة، واجت في الفاينل بالارقام اللي هو حكاها مش بارقام الكتاب.
- الدكتورة آية والدكتور عبد حكيهم مفيد لحياتم، بس مش مهم للفاينل ولا لامتحان الروتيشن،
- حضروا للروتيشن من سلايداتهم (سلايدات الأحد) مش من الكتاب بس، وارقاهم بتختلف عن الكتاب، اعتمدوها للفاينل مش ارقام الكتاب، كابلان لوحده بطعمش خبز معهم.
- الهيستوري معهم بتختلف، والها طريقة غير، رح يشرحولكم اياها، "بحبوا يرد الفقرات مش النقاط"، وبدقوا ع القواعد وما بدهم دفرنشل، والترتيب معهم بفرق عن الروتيشنات الثانية.
- واسئلة نهاية الروتيشنات السابقة بتكرر منها، بس بتكون كتابية مش دوائر، والجواب بكون شامل للموضوع، يعني بتكتب كلشي وما تختصر، فبتطلع من هاي الروتيشن مختم امورك.
- في طلاب لخصوا بعض مواضيع نضال ضروري تشوفوها، وتحفظوها رح تتكرر في الفاينل.
- موضوع الanti natal care مهم للحياة بس زنخ وما اجى عليه في الفاينلين ولا في امتحانات الروتيشن.
___________
- ملحوظات عامة:
- -حكي الدكاترة أهم من الكتاب، الكتاب بسواش شيكل قدام حكي الدكاترة.
- -الكتاب بجنن وسهل وبنختم، وفيديوهات كابلان ع المكتبة كثير منيحة قبل ما تبلش تدرس، وفيها علم كافي، لا زايد ولا ناقص، بس الدكاترة للاسف بلتزموش فيه للفاينل.
- -ما تدرس يو ورد، او امبوس، او ان بي ام اي، فش الهن داعي، وبتظيع وقت، الا اذا كنت خاتم وبتدور على علم لحياتك، والفاينل بيجي short MCQs والكيسيز مش طويلة
- -خلال الروتيشنات بتفوت على المكتبة وبتحل أكبر عدد من البنوك الموجودة، حفظ، فهم، كيف ما بدك، اجا منهن في الفاينل بس من اكثر من ملف، عشان هيك ما بنقدر نحكيلك مصدر ثابت، وللاسف البنوك كبيرة، فاذا ناوي ترد علي وتحل انت ملحوق اسئلة قبل ما تبلش.
- - بس تشوف حالك فاضي مشّي في الكتاب بالترتيب لانه مطلوب من الجلدة للجلدة، وفي شغلات مبنية ع بعض نوعا ما, فلما تكون دارس اللي قبل بتفهم احسن، وبتربط المواضيع أحسن.
- -عشان تفهم شو بصير في العمليات يفضل تكون دارس محاضرة الأناتومي، وبالمناسبة اجا منها اسئلة بالفاينل.
- -في مواضيع مش موجودة من الكتاب، لك الحربة تدرسها من سلايدات الاحد او تنتيشتر، زي محاضرة البربيريوم، ومحاضرة الانتي نيتال كير.
- اخر نقطة: عندك بني آدمة سفّااااحة ع اليوتيوب اسمها ندين شريف، يا الله ما اروعها واحسنها، بتقدر تحضرلها المادة كاملة، وبتقدر تحضر مواضيع معينة، يعني مثلاً بكرة عندك Aportion، بتكتب ع اليوتيوب Aportion ندين شريف, اسلوبها ممتاز، وسفّااااحة، بس بتحكي شغلات زيادة، ومرات بكون في شغلات ناقصة من الشرح، بس ممتازة جدا للفسيولوجي وهيكيد...اقصى استفادة منها بتكون للي بحضرلها كل قائمة التشغيل.
تمت النسائية بحمد الله
الجراحة
تُعرّف مادة الجراحة على أنها شتاااااااااااااااااااااات
رح اعطيكم خطة ناريّة، بدها دراسة أوّل بأول انا لو يرجع فيي الزمن بعتمدها، واغلب الوقت كنت احاول امشي عليها، بس انا بلتهي كثير، والزنقة في دمي المهم، بداية وقبل كل اشي، بتترك كل اللي في ايدك وبتروح بتدرس فيزيكال اكزامينيشن لسيف ظريف او خالد ميلاد ويفضل خالد ميلاد، ثم بتشيّك عليه من ملف الدكتور عروة ع المكتية، تمام؟ ظروووووووووري هالاشي 😂🪚 كتاب القصر العيني، لغته سهلة وفيه كلشي وشامل، بس طوييييل، ما بتقرأ صفحتين الا انت زهقان، مشان هيك بنصح تستعيض عنه بوهدان، صحيح فيدووهاته طويلة وكثيرة بس بتطلع حافظ وفاهم، وبتقدر تقرأ حكيه بدون الفيديوهات بس مع فيديو احسن وهو باعتبار تلخيص للقصر العيني بس بدون الاناتومي, لانه شارح الاناتومي في سلسلة منفصلة عن الجراحة، واطول من الجراحة 😂💔 أنا تعرفت ع الفيرست ايد في الروتيشن قبل الاخير، منيح تشوف الموضوع الصبح قبل ما تطلع بساعتين، بشمل الموضوع بشكل مختصر، وصراحة مفيد كثير، بس" شخصيا" ما حبيت جداوله لانه خطها زغير، مع انها شاملة ومنيحة وكثير طلاب اعتمدوا الكتاب كمصدر اول وأخير.
وكنت اراجع الموضوع من سيرجيكال ريكول، بس بنصحك تسبدل سيرجيكال ريكول بكتاب ثاني اسمه ABSITE فيه اسئلة مقالية اكثر واضافة عليهن في دوائر، وفي بيت جالا معظم اسئلة الروتيشن منهن، والامتحان الكتابي كان جاي اسئلة نص حرفي من ومنيح جداً تراجع اناتومي، رح ينبسطوا منك الدكاترة ويعتبروك نيرد.
شفت كيس بيزد مرة، حلو صراحة بس ما التزمت فيه ما بعرف ليش، فما عندي نصيحة واضحة عنه.
حكي الدكاترة مهم للروتيشنات اللي فيها أوسكي، في الاهلي اقضي اكبر وقت مع الدكتور رفيق، وبس يترككم روح مع المحتسب، البقية بتستفيد أقل من خلال الدوام معهم. في يطا اسأل كثير بنبسطوا منك، وصراحة هي احلا روتيشن فيهن، قد ما حكولنا عنها سيئة، اعمل حالك مهتم مع الدكتور بتنبسط، المرضى مناح والممرضين مناح والدكاترة مناح، شوي دزعيسى ناشف في الحكي ☺ بس والله طيب وبحب يفيدك، وفنان في العمليات، الابندكتومي بعملها في ٥ دقايق 😂، وخلوا ابو بكر يشؤح...سفاااح رسمي.
سلايداتهم ما حبيتها، اذا بتدرسها من المصادر فوق بكون احسن، ود.عيسى كثير بحب الراديولوجي، فاعمل حالك مهتم تسأل عن الصور رح يعتبرك شاطر. عالية نِكدة كثير، والدكتور مشتت شوي وبشتتك معه، بس شدته بتخليك تدرس، وبتوخذ اوسكي رسمي معه، وبتضل شاعر بالذنب وبتدرس، في دكتور ثاني بشرح حروق وجروح معه ادرسله بتستفيد لحياتك.
بيت جالا اعتمد فيها الحكي فوق بتبدع، الدكتور بحب الأناتومي كثير، وبسأل عن الموضوع اللي بتشرحوا فيه، فمهم تحضروا مع صاحب البريزنتيشن، وبسأل كثييييير
دورا اعتمدوا سلايداتهم للروتيشن والفاينل، والدكتور رائع وإنساني وبتنبسطوا معه.
اليووورد ما بفيدك ابدا للفاينل او الدوام، فقط لحياتك، فما بنصحك تغامر
فالخطة بالملخص: قبل ما تبلش جراحة بتدرس أهم المواضيع اللي بتتكر وبسألوا عنها وهي " appendex, bile, thyroid, herneias"
الباطني
المصدر المعتمد من الجامعة هو كتاب (ستيب اب) وهو المصدر الي اعتمده معظم الطلاب,
الكتاب كثير سلس وكل معلومة فيه حرفيا مفيدة وراح تلاحظوا هالاشي بس تحلوا من ال Uworld
فبالنسبة الي الكتاب highly recommended، بعض الطلاب اعتمدوا كتاب الحسيني وهو كافي وجيّد أيضا، والبعض القليل جداً اعتمدوا فيديوهاتالبورد مع سلايداته فقط.
ممكن تحتاجوا تستعينوا بفيديوهات حتى تفهموا بعض المواضيع كون الكتاب بعطي الخلاصة المفيدة
سواء بورد أو أوسموزيز، كله بمشي
صراحة المساق صحيح كان متعب بس جدا ممتع وراح تنبسطوا فيه،
أشياء بتمنى لو ما عملتها: راح يكون في load كبيييير جداا من ناحية البرزنتيشنات حرفيا كان مطلوب منا نعمل برزنتيشن يوم يوم وهالاشي كان مستهلك للوقت بطريقة مش طبيعية وكان يوخذ من حق المادة بالدراسة بشكل رهيب
فنصيحتي الكوا ما تعطوا البرزنتيشنات كثير من وقتكوا واعملوا اي اشي يسلك وخلص... بتقدروا تستعينوا بالبرزنتيشنات الي عملناها موجودين كلهم ع قروب الباطني...
١- بالنسبة للروماتولوجي مع الدكتور أمجد النتشة:
الدكتور كثير بكون معني بمدى ثقافة الطالب وقديش عنده معلومات راح تلاحظوا انه خلال الروتيشن كثير بسأل أسئلة عامة ما الها علاقة بالروتيشن....
هاي الروتيشن ضروري تستغلوها تتعلموا كتابة الهستوري بشكل صحيح...
الدكتور أمجد راح يعطيكوا كل الtips امشوا عليها وراح تعرفوا تكتبوا أحسن هستوري بطريقة احترافية
الروماتو مادتها صغيرة بس مليانة معلومات بدها تركيز بالدراسة وبتعتمد بشكل كبير ع الحفظ... بس سهلة بشكل عام وبتخلص بالراحة خلال وقت الروتيشن
مهم جداً تقرأوا عن الmetabolic syndrome تفهموهات كوّيس لانه رح تلاحظوا انه الدكتور امجد بربط 90% من حالات الروتيشن فيها
الدكتور امجد هو احد الدكاترة االي بعطوا المورننج حقه خلال الدوام، وبضل من 8-11 وهو واقف معكم ويشرحلكم كل حالة موجودة ويسألكم بالتفصيل
ممنوع تعملوا حالكم شاطرين وتعدلوا للدكتور لانه رح يتضايق منكم، شوما يحكي ولا الضالين امين، وإياكم تتفلسفوا أو تقاطعوه بالحكي.
الدكتور كثيييييييير بحب اليورود ورح يفرق معكم في الحل، وبينوله انكم بتدرسوا منه وبتحلوا منه، وإياكم ثم اياكم تحكوله انكم بتدرسوا من الإم آر سي بي، لانه من الله الأسئلة بتنحلش.
البرزنتيشنات بتنسخوا ستيب اب نص حرفي وبس بتضيفوا عليه صور وجداول يورود.
٢- الريسبايراتوري مع الدكتور أشرف الزغير:
الدكتور جدا شاطر وبعطي معلومات كثيير وبهتم بالفيزيكال اكزامنيشن وراح يعلمكوا اياه من الألف إلى الياء.
المادة زخمة ومحتاجة متابعة بس مش صعبة وفي منها نسبة منيحة اخذناها مع الدكتور طارق بمختبر الباثو وهالاشي سهل علينا، اعتمدوا الكتاب مع البورد.
٣- الكارديو مع الدكتور باجس:
هو صراحة حرام نسميها روتيشن راح يعطيكوا الدكتور شباتر للفيزيكال اكزامنيشن راح تلتهوا فيهن بال٤ ايام الي موجودة ويخلص الروتيشن وانتوا مش دارسين اشي من الكتاب... أنا شخصيا لحد هسا ما درست اشي من الكارديو
، مادة الكارديو في الحسيني وفي الكتاب سيئة جداً، ممكن تعتمدوها بس اكثر اشي رح تستفيدوا للروتيشن والفاينل من البورد وسلايداتهم، فلو درستوهن بدون الكتاب بتوفروا وقت وبتحققوا استفادة كبيرة، طبعا مع اسئلة يورود وام ار سي بي
٤- الانفكشن مع الدكتور مسعد:
المادة جدا زخمة عبارة عن حفظ حفظ حفظ حفظ فلازم تحاولوا تلموا منها قد ما تقدروا خلال الروتيشن وخصوصا أنه الدكتور مسعد ما بضغط من ناحية البرزنتيشنات فراح تلاقوا وقت تدرسوا عليها... الاغلب مش راح يقدر يختمها ولكن ضروري تلحقوا منها قد ما بتقدروا، البرزنتيشنات تركزوش عليها كثير، واياكم ثم اياكم تردوا عليه اذا حذفلكم اشي من المادة، لانه 70% من الفاينل اجا من المادة المحذوفة
٥- الايندوكراين مع الدكتور هاني:
اسمحولي هان اوقف شوي
أحلى روتيشن حرفيا من ناحية كل اشي
من ناحية معلومات راح توخذوا كم هائل من المعلومات الي عنجد عنجد مفيدة بشكل رهيب، من ناحية تربيط فسيو بباطني، من ناحية اكزامينيشن من تاحية اخلاق وتعامل
كل معلومة الدكتور بفسرها وبعطيكوا ليش وكيف مفش اشي عبثي يعني
راح تطلعوا فاهمين كل حرف وخاتمين المادة
الروتيشن كانت عبارة عن راحة نفسية أكثر من كونها روتيشن،
مهم جدا قبل كل موضوع تراجعوا الفسيو تبعه رح ينبسط منكم الدكتور ورح يخليكم تنفشوا المادة، وحطوا فسيو في البرزنتيشن وكثروا صور.
الجي آي "الهضمية"
بالنسبة للمادة كمادة كثييييير مهمة وكثير من المساقات الثانية مبنية عليها وخصوصا الجراحة فادرسوها كثير منيح
الي راح يوخذها قبل الجراحة راح يلاحظ الفرق وقديش بتساعد.
المطلوب ستيب أب، والتريتمنت والمنجمينت مطلوب.... ديروا بالكم
الدم والأورام
انا شفت الروتيشن مملة نوعاً ما، لانه مش كثير بتشوف مرضى، وللاسف حالتهم ميؤوس منها، فما بتحس بإنجاز العلاج، ولا نشوة الانتصار ع المرض، في جو اكتئاب في الحارة هناك ....على العموم، في الروتيشن رح ينشرح فقط أونكولوجي، الهيماتو سيلف ريد،
هسا بالنسبة للدراسة سلايدات الدكاترة خفاق، بس مملات كثير، وبتحسهن من جوليشيك، في طلاب درسوا من امبوس، بس مهما كان مصدر دراستك ضرووووووووري للروتيشن والامتحان تبصم بنك الاونكولوجي تبع عمر مرعي، وتكون ذكي شوي، حتة زغيرة، لدرجة إنك ما تفتح الكتاب في الروتيشن، ولا تسأل الدكتور عنه ،
وادرس كل الشباتر في الكتاب، حتى الشباتر المش مطلوبة، لانه بجي اسئلة منهن، زي الموليكيولار، والابيديميولوجي، والايتيولوجي...الخ
واذا في الروتيشن ما اجت الاسئلة منهن، خذوا حذركم واعرفوا انه العصافير اشتغلوا ، والفاينل من المريخ فادرسولكم مصدر منيح.
بس يا حبايبي العصافير الفاينل بلا البنك بنحلّش، صعب والله، فما تخربوا على حالكم وعلى غيركم.
update: الدكاترة عرفوا في البنك، فبدكم تدبروا اموره
بالنسبة للهيماتو ممكن تدرسها من سلايدات د نضال، او تلخيصات أسيل التميمي، او BNB، او اللي بعجبك، او تعمل مثلي وتدرسها من اوزموزيز هاي ييلد، بتوخذ علم احسن من غيرك، وبخليك تحل منيح، وتركز ع تريكات مهمة بتخليك تحل الكيسيز في الفاينل، وتنساش تحل كل شباتر بنك الهيماتو، خصوصا شابتر الكيسيز في الآخر، انا ما حليته للاسف واجا منه كثير اسئلة في الفاينل، يعني ما تحكي الشابتر مش معنا وما تدرسه، لا شوف السؤال واحكم بنفسك.
وملحوظة: حكي الدكتور مهم للامتحان في نهاية الروتيشن، بخليك تعرف ع شو تركز، يعني بجيب اسئلة من الكتاب بناء على شرحه.
في البرزنتيشنات، احكوا فيهن عن الستيجنغ عشان تطولوا في الشرح، واستفيضوا في الحكي عن الادوية،
واحكوا عن الاناتومي بشكل مختصر، بس هالاشي مش داخل في الفاينل
أشعة
المادة كانت عندي اول روتيشن، فممكن ما اكون افضل حدا ينصحكم للروتيشن، لانه ما كانوا يشرحولنا، بحجة انه الاحد قادم
لكن بقدر احكيلكم انه للفاينل سلايدات الأهلي كافيين، وما بتفلسفوا فيهن،
في تلخيص ع المكتبة لدفعة ٢٠١٨ لانوار، منيح لو تقرأوه عشان اسئلة الروتيشن، انه كيف تميز كذا عن كذا.
سلايدات العميد ما اجا منها، اعتبروها مراجعة، وكذلك سلايدات بيت جالا.
هسا خلال الروتيشن كان نفسي اميز الستركتشرز ع السي تي، واراجع الاناتومي، ولقيت كورس حضرت منه الثوراكس ليلة نهاية الروتيشن والله فخم ويا ريتني عرفته من قبل، طويل شوي، بس بشرح كل النورمال اناتومي بالاشعة، اكس ري، وسي تي، ورنين، وايكو.
مش رح يفيدك للامتحان النهائي كثير، بس رح يعطي عنك انطباع النيرد في الروتيشن، ويعلي تقييمك، لانه اللي معك رح يكونوا فاتحين ثمهم ومش عارفين يمزوا الاجزاء خصوصاً في الدماغ.
هي رابطها:
https://youtube.com/playlist?
في المستشفى الاهلي شوفوا سي تي، وايكوا قد ما تقدروا، وقضوا اكبر وقت ممكن مع د. حسين ابو شرخ قل نظيره والله ، فخم وشاطر وبحب يشرح، وعملياته محرزة.
في عالية خليكم عند الرنين، الزلمة هناك شاطر وبحب يشرح وبفهم، البقية مش كثير.
وفي بيت جالا: رح تقضوها عينات بريست، بس خلوا الدكتور نادر يشرحلكم الكسور، لانه كثير شاطر فيها، وفهمان.
امتحان نهاية الروتيشن بكون صور من امبارح جايين ع المستشفى وبسيطة جدا، وبتنحل بدون دراسة.
مراجعة ما قبل الامتحان اهم من دراستك كلها، لانه نص الامتحان منها
العيون: 
انا للأسف درستها من الكتاب ويا ريتني ما فعلت، ادرسوا سلايدات الدكتور امجد مجاهد مع تلخيص بلقيس، او ملف انسام.
الفاينل والروتيشن ولا حرف برا السلايد، مين ما كان دكتورك.
طلاب د.امجد في الاهلي كانوا مبسوطين، وكذلك طلاب عالية.
طلاب الدكتور محمد منسية في المحتسب، اذا ما بتطلبوا امتحان نهاية روتيشن رح تنخسفوا في التقييم، وما يغركم المدح والثناء، وقضوا وقت اكبر مع الدكتور اكرم لانه اشطر منه وبحب يشرح، وشرحه كويس.
امتحانات نهاية روتيشن الاهلي بتكرر منها في الفاينل، فجمّعوهن، وادرسوهن منيح. وهي رابط تجميعة دفعتنا
طلاب عالية دكتوركم رح يعتمد الكتاب بس انتوا حاولوا تدرسوا سلايدات د امجد خلال الروتيشن لانه الكتاب ما بيجي منه في الفاينل، والسلايدات بخلصن في يومين على قعدة زلام.
الجلدية
ادرسوا سلايدات الاحد كثير منيح، والمواضيع الناقصة ادرسوها من السلايدات الأمريكية،
انا درست الأمريكية وسلايدات الدكتورة بانة فقط، وبشوف انه هيك احسن، لانه الاسئلة في الفاينل٨٠- ٩٠٪ من سلايدات د. بانة، والسلايدات الأمريكية أسهل للحفظ والفهم من سلايدات الدكاترة الثانيين، رح تضل الدكتورة تحكيلكم ادرسوا الكتاب، بس صراحة مستحيل ينختم، واجا منه سؤالين فقط في الفاينل، فصراحة مش اشي وورثي، بجوز تدرسه وما تحل السؤالين
اطلبوا امتحان نهاية روتيشن وجمعوهن، ما بنعرف اذا بتكرر أو لا، سنوات أبو ديس اجا منها سؤالين بس،لكن الدفع. اللي قبلنا كل امتحانهم منه، وباقي الاسئلة واضح انها كتابة لانه من السلايدات، و من تفاصيل ما بتدق عليها وانت تدرس، فانتبه منيح لادق تفاصيل سلايدات د. بانة
ديروا بالكم ع التريتمنت مطلووووووووووووووب
وشوفوا صور لكلشي
في دكتور ع اليوتيوب اسمه عبد الرحمن رضى شارح ديرما واله تلخيص من فرح شاهين ع المكتبة، ادرسوه كتحضير، كثير بساعد للدراسة اللاحقة، وبخليك تجاوب في الروتيشن، بس بدك تنتبه انه في اختلاف في الارقام بينه وبين السلايدات.
النيفرولوجي
دوامها على مرحلتين:
مع الدكتور مأمون في عالية، رح يسرح فيكم في الشرح، ويحكيلكم قصص، وبكون مقتنع انكم فاهمين بس بتكونوا ضايعين ومش عارفين مين امير ومين مريم
بس في عالية يكفي تدرسوا تلخيص سراج مع تحديثات من تلخيص ساما، والفسيولوجي من الفيرست ايد ستيب ١.
ورح يطلب منكم تسلموا ٢ هيستوري، بنصحكم توخذوهم من بيت جالا، بتكونوا اخذتوا علم، وبتختاروا مرضى محرزين، لانه مليان سيندرومز في بيت جالا.
#تعديل: في شغلة مهمة بالعادة ما بنتذكرها لما تسالوا عن الروتيشن، وبالصدفة خطرتلي
الدكتور مأمون بختبر طلابه بالموضوع اللي رح ينشرح بحركة غريبة، بعطيكم قصاصات ورق، الصبح قبل ما تبلشوا برزنتيشن، وكل واحد فيكم يكتب سؤالين عن موضوع اليوم، وبوزع الورق عليكم بشكل عشوائي، وكل واحد بجاوب سؤال حدا من جروبه، فلو تتفقوا بين بعض ع الأسئلة اللي رح تكتبوها، بكون ممتاز عشان تبينوا نيردات 
في بيت جالا: الدكتور سمير رائع، بشرح، وشرحه منيح، ذكي الدكتور وعنده علم غزير، وبخليكم تحكوا مع المرضى وتطلبوا منهم الهيستوري في العيادة وبناقشكم، في بيت جالا الوضع احسن من عالية، ما بكفي تدرسوا من تلخيص سراج لبيت جالا،
بنصحكم وبشدة للي معه وقت تدرسوا من احمد شبل، انا درست المادة كاملة معه، للاسف طويلة وبتوكل وقت، بس بتطلع فاهم، وبغطي اكثر من ٩٠٪ من الروتيشن.
وللبرزنتيشنات احمد شبل رح يكون توب التوب، بكون الدكتور يعيد في حكيك، واضافات بسيطة فقط.
هسا أنا فوق هالحكي درست من ستيب اب، بنختم في يوم ونص يومين بالكثير، ودرست اوكسفورد ليلة الامتحان،
صراحة ما استفدت اشي منهم للفاينل، بس كعلم كثير لطيفين خفيفين، وممكن على حظكم يجيب من ستيب أب،
في طلاب درسوا كابلان باطني للنفرو وبحكوا شرحه ممتاز، واستفادوا للفاينل، بس انا ما جربت.
ع العموم انا بحكي ملخص: ادرسوا الفسيو من الفيسرت ايد ويفضل احمد شبل، وستيب اب للالكترولايت والفلود، وكابلانت للباقي،مع تلخيص سراج والله أعلم بكونوا كافين، بس بعيد وبكرر احمد شبل بده طولة روح، وقعدة، وابريق شاي .
وضروووري تطلبوا امتحان نهاية روتيشن، بلكي جبنا مصدر الأسئلة، لانه الفاينل، والله كثير صعب، وصعب تضمن النجاح فيهه.
روابط النفرو:
---------------------
فورم هيستوري:
https://drive.google.com/file/d/1XMCJdX8F3CDJLota_1uQdcPchQcDxQzm/view?usp=drive_link
----------------------
Nephrology B&B
سلايدات : https://drive.google.com/file/d/1-Px1hhHShNk4jN78u4lPDtp93vVhaqTa/view?usp=drive_link
فيديوهات:
-------------------
تلخيص احمد شبل \ أنوار الجعبري :
https://drive.google.com/file/d/1rFlXFxMJVKUj1KdRTNPEVdozgNUN1pw6/view?usp=drive_link
فيديوهات احمد شبلموجود في مجلد ETHICS: https://mega.nz/folder/bYkQkSAI#htTsh0EaP01ieckZ0YyGOg/folder/Cc9yXIrI
كتاب احمد شبل للرينال " ما في نفرولوجي منفصل":
https://drive.google.com/file/d/16yhb575sXyv02u463zo0xrZk1wXxqt0f/view?usp=drive_link
